بقالى شهر مدونتش

انهارده دخلت البلوج لقيت نفسى بقالى شهر مدونتش !!

ياترى ...

عشان مفيش احداث جديدة ؟
ولا البحث عن موضوع ؟

ولا مش قادرة اركز
الناس والاعلام والجرايد وكل حاجة بتتكلم فى موضوع واحد
وانا زهقت من الكلام ده ...

لدرجة ان انا لو عرفت ان المكان ده فى ناس بتتكلم وبترغى كتير
مش باروح
وقررت برضة انى ابعد تماما عن التجمعات اللى فيها ناس .

لأن...
اوقات الناس بتتكلم ومش بتضيف جديد وده صداع قوى


من يومين لى صديقة ماتت ودى كانت صدمة لى
لأنها فى سنى تقريباً او اكبر من بسنه او اتنين
وماتت من غير اى مقدمات
فى هدوء تام
ماتت

عندى شعور قوى تجاه كل اصحابى حاسة انهم وحشنى
حاسة انى عايزة اقول لكل واحده فيهم انا بحبك
انتى شريان لحياتى
ومصدر حب لقلبى
حتى الرخمين منهم
برضة عايزة اقولهم انى مقدرش استغنى عنكم
بس من فضلكوا متضايقونيش

عندى قناعة ان احنا لازم نعيش ونقدر كل يوم بيومه
لأن دى حقيقة
احنا مش عارفين
بكره هيجى ازاى
دى حقيقة
لازم نصدقها

كل يوم بسأل نفسى ايه هو الحب ؟
للأسف انا لغاية دلوقتى ملقتش اجابة عالسؤال بتاعى
بس كلام الناس بيقول
الحب غيره
الحب اهتمام
الحب تضحية
والحب موت

بس انا معرفش
انا لازم اوصل لأجابة
ولازم اوصلها بنفسى
ودى مهمتى الايام اللى جاية !!