الثلاثاء، 30 سبتمبر 2008

شوية حاجات

فى حاجات عايزه اقولهالك ومش عارفه اقولهالك ازاى حاسه ان فى حاجات ظهرت بنا مكنتش موجوده فى الاول ، اصل الحاجات دى لو مقولتهاش هتفضل جوايا فالاحسن انى اقولك على الحاجات .. بس انا مش عارفه ابتدى بأنهى حاجه ؟ .

علشان انا حسيت انى كنت حاجه وحصلت حاجات خلتنى حاجه غير الاولانيه ، حاجه مخليانى مش عارفه اكلمك بصراحه ومخليانى مضايقه قوى ومطلغبطه كده و مش عارفه مالى !!

كنت قاعده افكر فى الحاجات اللى كانت بتحصل بنا والاقى نفسى بضحك من غير ما احس واضم بُقى بسرعه واكشر قبل ما حد ياخد باله انى بحب وحصل وكنت فى الشارع ولقيت شفايفى بتضحك لوحديها ، طب ادور وشى فين دلوقتى كل النواحى فيها ناس واتكسفت كده فى نفسى .

على فكرة انا جبت كتب وقريت ومجلات وحاولت ادور على الحاجات دى وشفت مواضيع وارتحت شويه للحاجات اللى عرفتها وظهر انى كان فى حاجات معرفهاش قوى لكن بعد شويه رجعت زى الاول اصل الكتب لازم تتعاش مش تتقرى وتتشاف .

ورحت مع نفسى قعدت يومين و انا قاعده كده قلت اسأل نفسى عن شوية حاجات طبيعيه رحت سألت انا قاعده ليه وبعديها وقفت كده وسألت طب انا وقفت ليه واستغربت من كده وعلى كده وراحت منى الحاجات !!

قريت القصص وحاجات فيها خلتنى اكسر روتين الحاجات وابتدى اغير طريقة تفكيرى فى اسباب الحاجات وكنت قبل ما اوصل كده بكام خطوه فكرت فيك .. طب ما يمكن انت اللى عندك الحاجات ؟

ولا انت عادى كده .. ها

نظر الى ومد يده وتناول مفاتيحه وسحب اخر شفطه فى الكوبايه وقالى "روحى اتعالجى" واختفى .

زعلت قوى وقلت أظاهر مكنش المفروض اقوله عالحاجات .