مش عارفة اقرا الجرنان !!

ممكن الجرنان .. حاضر يا فندم .. لأ لأ انا مش عايزة ال(......) انا عايزة ال(......) .. حاضر يا فندم .. اتفضلى !!

امسك بالجريدة انظر حولى .. المكان كلة ناس .. اية القرف ده !! .. الواحد ميعرفش يقعد لوحدة شوية .. ولد وبنت قاعدين بيذاكروا .. ست وراجل بيشربوا سجاير .. خلاص الستات بقت تعمل كل حاجة .. تشتغل وتربى العيال وتشرب سجاير وتقعد عالقهوة وتصرف عالبيت .. مبقاش الراجل هو الاهم .. بقت فى مساواة ..

فى عيد ميلاد .. مجموعة كبيرة من البنات .. اللة شكلهم حلو قوى .. اظاهر انهم بيدرسوا .. ايوة شكلهم صغير .. اه لو تعرفوا انكم مش هتشتغلوا باللى انتو بتدرسوه .. اكيد هتزعلوا اوى .. ولا يمكن متزعلوش .. فى عينيكوا متفائلين و مستعدين تشتغلوا اى حاجة تجيب فلوس .. اكيد نظرتكم لنفسكم مش بيحددها انتوا بتشتغلوا اية .. صح اكيد ..

امسك بالجرنان ، عايزة اقرا العناوين الكبيرة .. مش عارفة .. مش عارفة اركز .. الموبايل بيرن .. ها .. الو .. هممم .. ها .. ماشى .. طيب .. خلاص 4:30 .. اوك 5:00 .. اوك 4:45 .. اوك .. خلاص خلاص .. لما توصلى كلمينى وانا هانزل .

خلاص اهدى بقى واقرى العناوين .. تحسن الجو يبدأ من اليوم .. كويس فهمت حاجة اهه .. الجو فعلا حلو انهاردة ..

حصل فراغ كبير .. كل واحد بقى يفكر بطريقة .. وانا مبعلقش!! .. علشان يظل السلام مخيم على العلاقة .. بس انا بقيت فى عزلة من كتر السكوت .. نفسى اصرخ جامد قوى من فوق برج القاهرة .. اقول انا موجوده .. بس انا عارفة بعد ما اصرخ هعيط ....

هعيط لية ؟ .... وهقعد اهدى فى نفسى.... اهدى فى نفسى لية ؟.... ما انا غضبانة ؟ .. اوف انا زهقت من نفسى مش فاهمها ..

مين دول ؟ اية اللى جايبهم هنا ؟ شكلهم كبير قوى .. وغير كده شكلهم مهم .. اظاهر رجال اعمال !! ..

ايه ده مفيش علامة يحطوها على المحل كده من برة يكتبوا عليها للشباب بس ولا للصغيرين بس . يا ساتر يا رب .. اهم هيقعدوا يبصوا على كل بنت ويتحسروا على شبابهم ..

يارب ميقعدوش جنبى .. لأ .. لأ .. امشوا .. يارب ميعجبهومش المكان .. لأ لأ .. عجبهم .. قعدوا .. لأ مش جنبى .. قعدوا قدامى ..

خلاص انا هبص فى الجرنان ومش هبص عليهم خالص ..

هقرا اهه ........

يا ترى هو فكر فى انهاردة ؟ .. انا طول النهار بفكر فية .. انا متهيألى حلمت بية .. انا ضحكت لتلاتة فى الشارع كنت فاكراهم هو .. انا بحبة ولا اية ؟!!! ..... لأ لأ بلاش حب .. الحب مبيجيش من وراه غير الالم ..

بس متستغربش .. مش اللى بيحب قضية ولا فكرة بيتألم كتير ؟! .. وممكن يتعذب ؟! .. عذاب عذاب لأ .. انا بخاف .. لأ .. لأ .. مش هفكر .. مش عايزة افكر .. مش عايزة اتألم ..

انا عايزة اهرب .. اهرب من نفسى .. اهرب من الناس .. اهرب من اصحابى .. اهرب من الحقايق .. انا هنام .. هنام ليل ونهار .. انا تعبانة .

صوت المغنية دى انا بحبة قوى .. صوت عربى وكلمات عربية .. بس انا مش عارفة هى مين ؟ .. يا ترى هى مين ؟.. اسوأ شئ انك تحب حد مشفتهوش ولو قابلتة تحس انه مش عارف قيمة موهبتة وهى إد اية بتهز قلوب ومشاعر التانيين ، ولا تلاقية بيغنى كلام وخلاص وانت الكلام لمسك لأنك انسان حساس .. مش لأنة حاسس باللى هو بيقولة ..

اغنية تانية جت وراها .. اغنية فرنساوى .. انا حاسة ان المغنية دى بقها صغير قوى .. اصلها بتنطق الكلمات كده .. يا سلام على الكلام الجميل .. انا مش فاهمة ولا كلمة طبعاً .. انا معرفش فرنساوى .. واكيد عينيها ضيقة .. اية الهبل دة ؟؟ .. اذاى يعنى عرفتى الشكل من الصوت ؟ ... ممكن تطلع غير كدة خالص .. خلاص بقى كفاية كده انا دماغى وجعتنى .. عايزة اقرا الجرنان ..

فى كلام مش فاهماه .. كلام بيصعب على الموضوع .. انا اصلا مش عارفة اركز .. يعنى اية الكلام ده ؟ .. ده فى مصطلحات كاملة مش فاهمها .. والكلام ده بيترتب علية باقى الموضوع .. اية الكلام ده ؟ .. لية ميعملوش الجرنان فى مستوى الطالب المتوسط ؟ .. قصدى فى مستوى المواطن المتوسط ؟ .. والمفروض كمان يفرضوا علينا الجرايد فى المدرسة علشان نتعود على القراءة والنقد والحوار ..

كفاية دوشة بقى .. عايزة اقرا ....

طب هبتدى من اخر صفحة .. مش لازم اقرا مالاول للأخر .. مش مهم الطريقة بس المهم الهدف ..

لأ مش فاهمة ولا كلمة .. خلاص هبتدى مالاول عشان افهم ..

اه هى دى الاغنية اللى انا مستنياها من الصبح .. جميلة .. ليس غيرُك .. فعلاً ليس غيرُك ..

كدة الجرنان يتعشى وينام !!